曼联热身赛又输波 坦哈格有乜咁开心？

xcy232323

       

        正准备下周一(29日)凌晨英足盃对纽波特郡嘅曼联，周四(25日)安排咗一场闭门热身赛，虽然「红魔鬼」最终以1比3输畀般尼，不过领队坦哈格就开心多过失望，因为劳基梳尔、哈利马古尼、卡斯米路等伤兵悉数复出，准备喺下半季全速冲刺。
        曼联上场联赛打和热刺後，已经接近2个星期冇比赛，所以特别安排一场热身赛磨练。养伤超过1个月嘅劳基梳尔、哈利马古尼都有落场，接近3个月冇踢嘅卡斯米路、养伤4个月啱啱复出嘅利辛度马天尼斯，以及加盟後未上过阵嘅副选门将比恩迪亚都有登场。
        曼联官方并冇报道呢场喺卡宁顿训练基地进行嘅闭门热身赛，但据《The Athletic》报道，曼联唯一入波系安东尼马菲奥斯射入12码，最终以1比3落败，继上年8月闭门热身输畀般尼0比3後，再一次输畀呢支由高柏尼领军嘅球队。
        虽然输波，不过对坦哈格嚟讲，今场热身赛志在畀伤愈嘅球员提升状态，战果反而唔系太重要，据报嚟紧英足盃对纽波特郡，曼联好大机会排出强阵，让一众主力借比赛操弗状态。