白礼顿闷和狼队 新兵未踢得迪萨比放弃买人

xcy232323

       

        周二(23日)凌晨英超赛事，白礼顿主场0比0闷和狼队，力压曼联升上联赛榜第7位。白礼顿今场占尽优势但入唔到波，领队迪萨比埋怨前锋太多伤兵，新加盟嘅华伦天巴高又未归队，赛後暗示今个月唔会再有新兵加盟。
        白礼顿今场有超过7成控球率，但面对狼队紧密防线未有太多机会，最近磅系韦碧克下半场射中柱，最终两队踢成0比0。迪萨比赛後表示：「我哋失咗太多唔应该失嘅分数，考虑到球队嘅伤兵情况，依家排第7位系值得骄傲。」三笘薰、苏利马治、西蒙艾丁拿、安素法迪等主力今场缺阵，新加盟嘅阿根廷小将华伦天巴高又踢紧奥运预赛，令白礼顿兵源捉襟见肘。
        迪萨比月初曾表示球队需要3至4个新球员，不过对狼队後被问到买人情况，呢位意大利教头就转晒口风：「转会嘅事唔系我嘅工作，我嘅任务系专注球队训练，建立出球队风格，制造一个畀球员发挥最佳表现嘅环境。」