美斯争议性夺世界足球先生 夏兰特爸爸黑面

xcy232323

       

        国际足协年度最佳颁奖礼周二(16日)凌晨喺英国举行，最受关注嘅最佳男子球员(世界足球先生)出现史上最紧凑局面，美斯同艾宁夏兰特同得48分情况下，美斯凭较多「队长首名票」惊险赢出。不过呢个结果就引起争议，由於今次选举系唔计世界盃，意味美斯系主要靠喺美职嘅表现击败「3冠王」夏兰特，难怪夏兰特爸爸现场黑晒面！
        世界足球先生最後3强为美斯、夏兰特同基利安麦巴比，美斯上年已凭赢得世盃冠军嘅战绩第7度封王，今届评分期系由2022年12月19日至上年8月20日，即系卡塔尔世盃之後开始计算，期间美斯最大功绩系法甲冠军，自上年夏天开始已转战美职，但最後竟然赢到破尽入球纪录、为曼城赢得欧联、英超同英足盃冠军嘅夏兰特。
        评选系由国家队主帅、国家队队长、各国传媒代表同球迷4个界别投票，结果美斯赢出队长同球迷投票、夏兰特就赢出主帅同传媒投票，最终2人同得48分，但美斯喺「队长首名票」得到107分，力压得64分嘅夏兰特当选，麦巴比就以35分排第3位。计晒改制前嘅世界足球先生、国际足协金球奖、最佳男子球员，美斯纪录性第8度赢得冠军，由於美斯并冇出席颁奖礼，奖项由主持兼昔日队友亨利代领。
        最有趣嘅系，当大会宣布美斯成为世界足球先生嗰阵，镜头即刻影住观众席上嘅艾宁夏兰特爸爸，见到佢黑晒面兼一脸茫然，亦冇跟大队一齐拍手掌，唔少网民都留意戥佢哋唔抵：「夏兰特入咁多波同拎咁多冠军，最後一个个人奖都冇，简直系足坛最大劫案」、「我系夏兰特爸爸都会黑面」、「世界足球先生只系人气选举」......