轩达臣赴阿积士体测 沙特白踢半季1蚊都冇

xcy232323

       

        英格兰球星佐敦轩达臣落实重返欧洲！权威记者Fabrizio Romano报道，轩达臣同阿积士已就转会达成协议，将会签约至2026年夏天(2年半合约)，佢周四(18日)即启程去荷兰做体测。据英国传媒报道，轩达臣喺沙特踢咗半季，原来从未出粮，依家离队後更唔会再收到钱，等如「白踢」半年！
        据《每日电讯报》报道，轩达臣喺伊蒂法克虽然有35万镑(约350万港元)周薪，但出於税务问题，人工一直延迟发放，至今仍然未有1蚊落过袋，但佢因为希望重返欧洲，近日亲自同伊蒂法克谈判，成功获球会答应免费放人，消息指其中一个条件，就系放弃仍未发放嘅人工，意味上半季做咗「免费劳工」。
        33岁嘅轩达臣上年加盟伊蒂法克嗰阵，表示系一个好机会帮助沙特联赛发展，结果佢踢嘅19场只得6场胜仗，消息指家人未能适应亦系佢急於离开嘅重要原因，有报道指轩达臣老婆因为衣着问题，经常被当地人指指点点，而且居住环境、交通、天气等都未能适应，所以轩达臣要不惜一切重返欧洲。