沙拿伤出势缘尽非国盃 利物浦噩耗！

xcy232323

       

        利物浦球迷最唔想见到嘅画面出现！周五(19日)凌晨非国盃B组赛事，埃及同加纳踢成2比2平手，不过埃及前锋穆罕默德沙拿喺上半场勇战受伤，强忍泪水离场兼要队友安慰，好大机会缘尽今届赛事。埃及2战2和出线未明，但沙拿或要面临长达8星期缺阵，对利物浦系一大噩耗！
        埃及同加纳首仗都失分，今仗为争胜进行激战，踢到上半场尾段埃及受到连环打击，沙拿冲刺後突然按住左脚大腿，军医入场治疗後要退下火线，佢离场嗰阵情绪激动，要队友一直安抚。祸不单行嘅系沙拿离场後，加纳就由效力韦斯咸嘅古达斯入波领先1比0。
        下半场埃及倾力反扑，马莫殊68分钟把握对手犯错追平，但3分钟後古达斯又入波帮加纳再次领先，埃及转头又由穆斯塔法穆罕默德追成2比2，最终两队各得1分。埃及领队维多利亚表示：「希望沙拿问题唔大，但依家真系唔知咩情况，我谂唔系太严重，睇下点。」
        沙拿今次疑似拉伤左脚大腿，休养期好视乎伤势程度，如果系最轻微嘅Grade 1，可能1星期就可以康复，但如果伤势较重，养伤时间可以由2个星期去到8个星期。非国盃决赛喺2月11日举行，利物浦本来希望埃及早早出局，等沙拿可以尽快回归，但如果受伤而回，对「红军」会系最坏嘅结局。