夏兰特想转投皇马？哥帅咁回应

xcy232323

       

        近期多间西班牙传媒指曼城前锋艾宁夏兰特喺曼彻斯特生活得唔开心，并且唔锺意当地天气，打算今夏转投西甲豪门皇马。曼城领队哥迪奥拿忍无可忍，喺记者会上批评西班牙传媒作故仔，并寸对方了解夏兰特，仲多过自己。
        哥迪奥拿被问到夏兰特想去皇马一事，佢话：「我点知，你哋应该去问西班牙媒体，特别系马德里传媒，可能佢哋会知得多过我，我唔觉得夏兰特唔开心，如果一定要话佢唔开心，都只系因为佢早前因伤缺阵两个月，我管唔到其他人把口，最重要系夏兰特现时生活非常开心，如果有一日佢唔开心，佢自然会作出决定。」
        哥帅更加暗示皇马魅力下降，曼城足以留住队内核心，夏兰特上仗英超对般尼，後备上阵复出，踢咗20分钟。
        近年不时传出皇马有意收购艾宁夏兰特，但以目前情况睇，「银河舰队」应该会全力争取签入今夏恢复自由身嘅巴黎圣日耳门射手基利安麦巴比。