祖记签「英冠仔」帮拖 成争标秘密武器

xcy232323

       

        祖云达斯喺冬季转会市场关闭前，成功借入修咸顿中场卡路士艾卡拉斯，唔好睇小呢位21岁阿根廷新星之前踢英冠，其实佢属於抢手货，国际米兰、AC米兰1年前已经想签入卡路士艾卡拉斯，但未能成事，辗转都系登陆意甲，成为祖记争冠「秘密武器」。
        卡路士艾卡拉斯出身於阿甲竞赛会青训系统，米兰双雄上年1月不约而同睇中佢，但出手唔够修咸顿阔绰，「圣人」斥资1,350万欧元(约1.13亿港元)收购呢位新星。修咸顿上季英超护级失败，卡路士艾卡拉斯上阵18场联赛有4球进帐，加上今季英冠及盃赛，佢为「圣人」各项赛事47次披甲入8球及5次助攻，上年10月晋身阿根廷大国脚，引起祖云达斯关注，并出手借入卡路士艾卡拉斯，顶替分别因为服食禁药、违规赌波而被罚长期停赛嘅保罗普巴、法基奥利。
        根据借用条款，祖记今夏有权以4,950万欧元(约4.18亿港元)买断卡路士艾卡拉斯，前提系佢必须交出好表现，加盟首战即遇上国际米兰，正系艾卡拉斯证明身价嘅好机会。